Pacquiao ganahan sa Estilo ni Thurman
CEBU, Philippines – Ganahan si Pinoy ring star Manny Pacquiao sa estilo sa inawayan ni Keith Thurman hinungdan nga mao kini ang iyang gipili aron makontra sa sunod niyang pagkatkat sa ring.
Ang 40-anyos nga si Pacquiao, ang WBA welterweight champion, ug si Thurman, ang walay pildeng WBA super welterweight champion, gikatakda nga magsinukmagay sa usa ka unification bout karong Hulyo 19 sa gipinalisar pang binyu didto sa Las Vegas.
Ang duha ka banggiitang mga boksidor pormal nga moanunsiyo sa ilang sangka pinaagi sa usa ka Press Tour karong Mayo 20 didto sa New York ug sa Mayo 21 didto sa Los Angeles.
Matud pa ni Pacquiao nga pareho sila og estilo ni Thurman mao nang masaligon siya nga makadalit sila og usa ka maanindot ug eksplosibong away sa ilang mga fans.
"I liked the way he fought against Danny Garcia," matud pa ni Pacquiao segun sa taho ni Kevin Iole sa Yahoo Sports. "I thought his style would match up well with mine. We are going to give the fans a great fight and an exciting night."
Si Pacquiao naglantaw sa unahan alang sa usa ka binukbukay nga puno sa aksiyon batok ni Thurman.
"I anticipate an action fight from him," sumala pa sa bugtong eight-division world champion sa kasaysayan.
Si Pacquiao nagkupot og 61-7-2 record uban ang 39KOs, samtang si Thurman wala pa'y pilde sa 29 ka away diin 22 sa iyang mga biktima iyang gipakamang.
- Latest
