CEBU, Philippines – Dili masukod ang kapamahiubsanon ni Cebuano PBA star June Mar Fajardo human siya mipadayag nga daghan pa siya og angay nga mapalambo sa iyang duwa.
Kini bisan pa og gidawat niya niadtong Miyerkules sa gabii ang ikaunom niyang 'Best Player of the Conference' award sa wala pa sugdi ang Game-4 sa PBA Philippine Cup.
Ang San Miguel Beer center nga mi-average og 20.6 points ug 13.2 rebounds sa conference mitali og 1,165 points nga layo kaayo og biya gikan sa mga ubang kandidato alang sa maong award.
Si NorthPort Batang Pier forward Sean Anthony mirehistro og 641 alang sa ikaduhang dapit, samtang iyang teammate nga si Stanley Pringle adunay 473 sa ikatulo.
Bisan pa niini, ang 6-foot-11 nga si Fajardo miingon nga wala niya giisip iyang kaugalingon nga labing dominanteng PBA player karon ug maningkamot gihapon nga mapanindot pa iyang duwa sa opensa ug depensa.