CEBU, Philippines — Gipilde sa Mehikanong si Saul "Canelo" Alvarez ang Amerikanong si Daniel Jacobs pinaagi sa unanimous decision sa binukbukay tali sa duha ka bangiitang world middleweight champions kagahapong adlawa didto sa T-Mobile Arena sa Las Vegas, Nevada.
Gawas nga mihipos sa iyang WBC ug WBC titles, gilabni sab ni Alvarez ang IBF belt ni Jacobs sa maong labing dako nga away sa boksing karong tuiga nga maoy nagtimaan sa iyang pagbalik sa middleweight division.
Ang 28-anyos nga si Alvarez mipatigbabaw sa scorecards sa tulo ka mga judges sa iskor nga 115-113, 115-113 ug 116-112.
Sukad siya napilde ni Floyd Mayweather niadtong 2013, si Alvarez milansang og 10 ka sagunson nga daog uban ang usa ka tabla ug lima ka knockouts.
Sa kinatibuk-an, si Alvarez nagtangag na karon og 52-1-2 record uban ang 35KOs, samtang ang 32-anyos nga si Jacobs nadakin-as ngadto sa 35-3, 29KOs.