Lillard bayani

CEBU, Philippines – Nahimong bayani si Damian Lillard human iyang napasud ang  37-footer  three-point shot sa katapusang segundo sa duwa aron dad-on ang Portland Trail Blazers sa second round sa NBA Western Conference playoffs.

Ang Blazers hingpit nga mitagak sa Oklahoma City Thunder human midaog sa iskor nga 118-115 sa usa ka kulbahinam nga duwa kagahapon didto sa ilang balwarte sa Moda Center sa Portland, Oregon.

Ang tres ni Lillard nga mitapos sa duwa uban ang 50 puntos, maoy mipalong sa paglaum sa Thunder nga makabalik pa sa serye. Gipakita sa All-Star point guard nga angay siya nga isipon nga usa sa mga lig-ong kandidato pagka-MVP ilabi na nga nahimo sa Blazers pagpukan ang Thunder gibitoonan og daghang All-Star players sama nila ni Russel Westbrook ug Paul George.

Nausik ra ang 36 puntos ni George ug triple-double ni Westbrook nga adunay 26 points, 11 rebounds ug 14 assists.

Ang Blazers magpaabot na lang sa modaog sa serye tali sa San Antonio Spurs ug Denver Nuggets.

Sa laing bahin, gitiwasan sa Philadelphia 76ers ug Toronto Raptors ang tagsa-tagsa nila ka mga kontra aron pag-abante ngadto sa ikaduhang hugna sa NBA playoffs.

Si Joel Embiid mipupo og 23 puntos ug milangkat og 13 ka rebounds sa dihang   gipalagpot sa 76ers ang Brooklyn Nets, 122-120. Ilang gitak-op ang serye sa baraha nga 4-1. Banggaon sunod sa Sixers ang Raptors nga mitagak sa Orlando Magic sud sab sa lima ka duwa nga ilang gituldokan pinaagi sa 115-96 nga demolisyon.

Gawas ni Embiid, lain pang lima ka mga batos sa Philadelphia ang mikadlit og double-figures apil na sila si Ben Simmons ug Tobias Harris  nga nagkumbinar og 25 puntos. Sila si JJ Redick ug James Ennis III parehong miiskor og 11 puntos, samtang si Jonathon Simmons mitampo og 10 puntos.

Si Rondae Hollis-Jefferson mikamada og 21 puntos, apan si D'Angelo Russell nalimitahan ngadto lamang sa otso puntos hinungdan sa pagkagisi sa Nets.

Sa laing bahin, si Kawhi Leonard mipabuhagay og 27 puntos, pito ka rebounds ug duha ka assists aron pangulohan ang Raptors ngadto sa NBA Eastern Conference semifinals.

Balanse kaayo ang ataki sa Raptors nga nakakuha sab og 24 puntos, unom ka rebounds ug upat ka assists gikan ni Pascal Siakam. Si Kyle Lowry miamot og 14 puntos, samtang sila si Serge Ibaka ug Norman Powell nagkumboy'g 21 puntos.