Motocross sa Medellin kasado na
CEBU, Philippines — Human sa San Remigio, magpadayon ang kulbahinam nga aksiyon sa motocross sa amihanang bahin sa Sugbo pinaagi sa pagpahigayon sa 2019 Mayor Joven Mondigo Invitational Motocross karong Abril 28 didto sa lungsod sa Medellin.
"Taud-taud na sab ta nga wala makapalumba sa Medellin ug naglantaw ko sa unahan sa laing maanindot ug makalingaw nga lumba didto," matud pa ni Cebuano businessman-sportsman Lou Ornopia sa MS Motosuit nga maoy nagorganisa sa maong karera.
Sama sa 21st Calambua Motocross Cup didto sa Calambua, San Remigio sa miaging semana, kapin sa 100 ka riders gikan sa nagkadaiyang dapit sa nasud ang maghugop sa Medellin aron mopakita sa ilang abilidad dili lamang sa pagpadagan, apan hasta sab sa pagpakurbada ug pagpalayat sa ilang mga motor.
"Seguradong kulbahinam nga aksiyon ang masaksihan sa mga manan-aw gumikan sa kalibre sa mga riders nga moapil sa atong lumba," dugang pa ni Ornopia, nga kanhi gipasiduggang "Sportsman of the Year" sa Sportswriters Association of Cebu (SAC).
Nag-una sa listahan sa mga lig-ong entrante mao ang duha ka pambato sa Sugbo nga sila si BJ Pepito ug Jonjon Adlawan. Gipaabot nga dagkutan nila og balik ang ilang panagkaribal human ilang gibahin ang pro open ug expert division titles didto sa Calambua.
Gawas sa pro open ug expert, lain pang mga kategoriya nga kumbatihan mao ang local enduro, beginners production, mini class 50cc and 85cc, intermediate, novice open production ug ladies open. Duna sa'y espesyal nga kompetisyon alang sa underbone ug buggy class.
Gipresenta sa MS Motosuit inabagan sa Medellin LGU ubos sa liderato ni Mayor Benjun Mondigo, ang usa ka adlaw nga torneyo gipaluyohan sa MSY Holdings Corporation, Martin Salimbangon Yeung, CLS Properties, Congressman Benhur Salimbangon, Alex Patino, Gonzalodo Enterprises, Duros Development Corp., Elton Salimbangon, Engr. Godofredo Laga Jr. ug Liga ng mga Barangay President Edwin Salimbangon. (BANAT NEWS)
- Latest