Crawford, Khan magpinaksitay na

CEBU, Philippines — Ang wa'y pildeng kampiyon nga si Terence Crawford modepensa na sa iyang WBO welterweight title batok ni Amir Khan karong adlawa didto sa Madison Square Garden sa New York.

Si Crawford dunay 34-0 record uban ang 25KOs, samtang si Khan nagtangag og 33-4 nga baraha uban ang 20KOs.

Inilog kaayo sa tapad si Crawford, apan si Khan kompiyansa nga iyang bughaon ang usa sa labing banggiitan nga mga boksidor karon sa kalibotan.

Wa'y bisan usa ka batid ang mihatag kaniya og tsansa nga modaog, apan si Khan nagkanayon nga iyang tay-ugon ang kalibotan sa boksing dili lamang ang iyang kusog, apan hasta sab ang iyang utok.

Matud pa ni Khan nga siya maoy mas utokan ug maayong boksidor kay sa ni Crawford.

Samtang si Khan bokal kaayo sa iyang tinguha, buot ni Crawford nga iyang mga kumo na lang unya maoy iyang pasultion.