USC Warriors hari sa Naga Inter-Collegiate caging
CEBU, Philippines — Ang University of San Carlos (USC) Warriors mitipi sa University of Southern Philippines Foundation (USPF) Panthers, 76-67 sa finals aron maghari sa 1st City of Naga Basketball League (CNBL) Inter-Collegiate Championship niadtong Domingo didto sa Enan Chiong Activity Center.
Si Kurt Trangia mitagak og 20 puntos, samtang sila si Froiland Mangubat ug Roosevelt Jelianggao nagkumbinar og 34 puntos timaan sa balanseng ataki sa Warriors.
Ang USC ni coach Bong Abad alkansi og tres puntos sa halftime, 35-38, apan nakabawi sa second half dayon na ngadto sa pagbulsa sa P100,000 nga ganting salapi.
Ang USPF nga gipangulohan nilang Nigerian import Rich Managor ug RR Cauba nga mitali og 15 puntos matag usa, duna hinuo'y gihapoy angayan nga ikalipay kay nakadawat sila og P75,000 bugti sa ilang pagpahiluna sa ikaduhang puwesto.
Sa gubat alang sa ikatulong dapit, ang University of San Jose-Recoletos (USJ-R) Jaguars nakaipsot batok sa University of Cebu (UC) Webmasters, 85-82.
Sila si Elmer Echavez, Tricky Peromingan, Nicole John Ubalde ug Fletcher Galvez nagkumboya'g 74 puntos alang sa Jaguars nga mibulsa og P50,000.
Si Tristan Albina mipabuto og 20 puntos, si Paul Galinato miiskor og 14 puntos ug si Darrell Shane Menina mikadlit og 13 puntos sa pilderong UC. (BANAT NEWS)
- Latest
