Sixers abante na sa playoffs

CEBU, Philippines — Gipilde sa Philadelphia 76ers ang labing maayong team karon sa NBA nga Milwaukee Bucks, 130-125 aron moabante sa playoffs kagahapon didto sa Fiserv Arena sa Milwaukee, Wisconsin sa Milwaukee.

Si Joel Embiid mikabkab og 40 puntos ug  milangkat  og 15 ka rebounds nga nakasugakod sa gipabutong career-high 50 puntos ni Giannis Antetokounmpo aron bihagon ang Bucks.

Mao kadto ang ika-52 nga 'double-double' ni Embiid sa iyang karera ug ika-25 nga higayon diin siya moiskor og dili momenos 30 puntos ug molangkat og dili momenos 10 ka rebounds sa usa ka duwa.

Labing mangtas si Embiid sa katapusang kuwarter diin siya mikadlit og 18 puntos alang sa Sixers.

Nakaangkon hinuon og dakong suporta si Embiid gikan nilang Jimmy Butler ug JJ Redick nga nagkumboya og  46  puntos alang sa Sixers nga nakasagunson na og upat ka daog.

Didto sa Madison Square Garden sa New York, si LeBron James miiskor og 33, apan dili kini igo aron paglikay sa Los Angeles Lakers sa 124-123 nga kapildihan batok sa New York Knicks, ang labing bati nga koponan karon sa liga.

Ang Lakers nga wala na'y purohan nga makabahin og luna sa playofffs, naglabaw pa unta og 11 puntos, 122-111 sa hinapos nga bahin sa katapusang kuwarter, apan mikolapso sila taliwala sa mainit nga rally sa Knicks.

Daw sa gisungog gyud sa panahon ang Lakers sa maong kaparotan nga naglansang kanila sa ika-11 nga dapit sa Western Conference.

Sa uban pang mga duwa, si Chris Paul mihipos og 25 puntos sa dihang gitumba sa Houston Rockets ang Minnesota Timberwolves, 117-102, samtang si Nikola Vucevic mikolekta og 27 puntos ug 20 ka rebounds sa Orlando Magic nga mibihag sa Atlanta Hawks, 101-91. (BANAT NEWS)