CEBU, Philippines — Wala mabalaka si Los Angeles Lakers president Magic Johnson nga ika-10 sila nga dapit sa Western Conference uban ang rekord nga 28-29 sa National Basketball Association.
Si Magic miingon nga dako iyang pagsalig nga makasud ang Lakers sa playoffs tungod sa presensiya sa iyang superstar nga si LeBron James.
Ang Lakers makigharong karon sa Houston Rockets didto sa ilang balwarte sa Staples Center.
Ang NBA legend nga si Magic miingon nga kun himsog lang iyang mga players, seguradong makahimo sila og winning-streak nga mohatod kanila sa playoffs.
Nagtuo usab si Magic nga dili motugot si James nga mapalta sa playoffs tungod kay 13 ka sunod-sunod nga season na kini nga miduwa sa playoffs.
Sa laing bahin, si Golden State Warriors guard Stephen Curry miingon nga mas seryoso sila sa ilang mga duwa karon nga nahuman na ang NBA All-Star.
Si Curry nagkanayon nga nagtinguha sila pagsakmit sa grandslam title bisan pa sa mga koponan nga mobabag sa ilang dalan sama sa Oklahoma City Thunder, Rockets, Toronto Raptors ug Milwaukee Bucks.