CEBU, Philippines — Gilat-an sa Powerfloor ang Liquid Tile, 69-44 sa ilang knockout final match aron sakmiton ang kampiyonato sa Davies Paints Cup 2018 niadtong weekend sa University of San Carlos-Main gym.
Luyo sa pagpanginit ni Lawrence Gayotin, gidominar sa Powerfloor ang duwa gikan sa pagsugod dayon na ngadto sa paglubong sa Liquid Tile og 25 puntos. Si Gatoyin maoy napiling Finals MVP.
Wala sab hinuon magmahay si Michael Vincent Cinco sa Liquid Tile gumikan kay siya man maoy gibayaw nga conference MVP. Sila si Gayotin ug Cinco nangulo sa Mythical Five uban nilang Darren Morandante ug Bong Gabison sa Mondo-Skimcoat ug Ayi Armenion sa Powerfloor.
Ang lain pang mga individual awardees mao sila si Cinco (scoring champion), Gayotin (blocks), Morandante (assists), Ralph Anthony Catugas sa Liquid Tile (steals) ug Michael Estrada sa Megacryl (rebounds).
Sa laing bahin, gipanitan sab sa Mondo Skimcoat ang Bio-Fresh, 88-68 aron pagpahiluna sa ikatulong dapit.