CEBU, Philippines — Laraw sa Alab Pilipinas nga mokutlo sa ika-10 nilang sunod-sunod nga daog sa ilang balwarte batok sa Saigon Heat sa pagpadayon sa aksiyon sa ABL karong adlawa didto sa Hoopsdome sa Barangay Gun-ob, Dakbayan sa Lapu-Lapu.
Ang duwa sugdan sa alas-7 sa gabii.
Ang Alab nga nag-una sa standing sa ilang 11-2 record mag-atubang og lisud nga duwa batok sa mga Vietnamese nga anaa sa ikatulong dapit sa standing sa ilang 10-6.
Kompiyansa hinuon si coach Jimmy Alapag nga mainat pa ang ilang daog didto sa Hoopsdome. Ang Alab milampos sa una nilang pagduwa sa maong korte dihang ilang gilubong ang Zhuhai Wolf Warriors sa miaging bulan.
Una nang miingon si Alapag nga taas ilang kompiyansa kun moduwa sa Sugbo tungod sa grabeng suporta gikan sa mga Cebuano basketball fans.
Mangulo sa Alab karon sa Alab mao ang import tandem nila ni Renaldo Balkman ug PJ Ramos. Si Balkman mo-average og 26 puntos matag duwa, samtang si Ramos adunay 19.2 points average.
Walay seguro kun moduwa ba ang reigning ABL MVP nga si Ray Parks Jr. tungod sa injury, apan anaa ang mga sinaligang locals sama nila ni Josh Ubiztondo, Lawrence Domingo ug Ethan Alvano.