CEBU, Philippines — Giuwan og mga pagdayeg si Manny Pacquiao human iyang gikulata si Adrien Broner dayon na ngadto sa pagkulit og 'unanimous decision' nga kadaogan alang sa malampuson niining pagdepensa sa iyang WBA welterweight title niadtong Domingo didto sa MGM Grand Garden Arena sa Las Vegas.
Wala man tuod niya mapatumba si Broner, apan daghan gihapon ang misaludo ni Pacquiao gumikan kay hait ug bangis gihapon ang inawayan niini bisan nag-edad na og 40-anyos.
Usa sa mga mibilib ni Pacquiao sa impresibo niyang dominasyon ni Broner mao ang kababayan niyang si Jerwin Ancajas, ang kasamtangang IBF super flyweight champion.
Si kanhi two-division world champion Gerry Peñalosa masasigarbuhon usab sa kadaogan sa bugtong eight-division world champion nga suod kaayo niyang higala.
Susama sab og sentimento ang pipila ka mga boxing legends nga sila si Roy Jones Jr., Lennox Lewis, George Foreman ug Oscar de la Hoya.
Gani sa tan-aw ni De la Hoya, si Pacquiao mura lamang og nakig-sparring ni Broner.
Niining tanan, milampos si Pacquiao sa iyang misyon nga pamatud-an nga ang edad numero lamang ug sa gihapon duna siya'y gahum nga tuyukon og balik ang orasan. (BANAT NEWS)