CEBU, Philippines — Gitugotan na si Los Angeles Lakers guard Rajon Rondo nga mobalik og praktis human makapalta og 12 ka duwa kay nabali ang iyang tudlo.
Ang 32-anyos nga si Rondo, kinsa mitabang sa Boston Celtics paglangkat sa 2008 NBA title, nayayay atol sa ilang pagpilde sa Golden State Warriors niadtong Disyembre 25. Tulo ka adlaw ang milabay gi-operahan ang tuo niyang tudlo.
Si Rondo nakaduwa lamang og 14 ka duwa sa ika-13 niyang tuig sa NBA diin siya mi-average og 8.4 points, 6.7 assists ug 4.4 rebounds matag duwa uban sa Lakers. Sa susama nilang duwa batok sa Warriors, si LeBron James nakahiagum sab og groin injury ug nakapalta sab og 12 ka duwa.
Gisalikway sa Lakers ang posibilidad nga si James molugwa sa korte sa ilang duwa batok sa Houston Rockets karong adlawa, apan lagmit makapakita na kinig aksiyon sa ilang rematch batok sa Warriors karong Martes didto sa Staples Center sa Los Angeles, California.