CEBU, Philippines – Angayan lamang nga si Floyd Mayweather Jr. motan-aw sa away ni Manny Pacquiao batok ni Adrien Broner karong Domingo kun gusto niining paypayan ang kayo sa gihandum nilang "rematch" ni Pacquiao.
Mao kini ang pagabuhaton ni Mayweather.
Gikompirmar ni Mayweather Promotions CEO Leonard Ellerbe nga ang walay pildeng kanhi pound-for-pound king molugwa sa ringside aron personal nga motan-aw sa pagdepensa ni Pacquiao sa iyang WBA welterweight title batok ni Broner didto sa MGM Grand Garden Arena sa Las Vegas, Nevada.
"Yes, he's coming," butyag pa ni Ellerbe ngadto ni Dino Maragay sa Philstar.com.
Kun ugaling molampos si Pacquiao, hayan nga makumbinser niya og usab si Mayweather nga hatagan siya og laing tsansa nga magsangka sila og balik ibabaw sa ring.
Unang nag-abot sila si Pacquiao ug Mayweather sa labing dako nga away sa kasaysayan sa boksing nga gibansagan og "Fight of the Century" niatong Mayo 23, 2015 didto sa MGM Grand. Si Mayweather maoy midaog pinaagi sa kontrobersiyal nga desisyon.
Gitataw hinuon ni Pacquiao nga sa pagka karon wala pa siya maghuna-huna sa ilang "rematch" ni Mayweather gumikan kay gipunting ang iyang atensiyon ngadto ni Broner.