James midaog katapusang duwa nilang Wade

CEBU, Philippines — Si LeBron James maoy midaog sa katapusang sangka sa hataas nilang panagkaribal ni Dwyane Wade human kini miiskor og 28 puntos uban ang siyam ka rebounds ug 12 ka assists sa dihang ang Los Angeles Lakers milansang og 108-105 nga daog batok sa Miami Heat kagahapon didto sa Staples Center sa Los Angeles, California.

Sila si James ug Wade nga dungan miduwa sa NBA isip kabahin sa Draft nga namungingi og mga bitoon niadtong 2003, miporma sa labing sikat nga panagkaribal ug ingon man labing suod nga panaghigala sa tibuok dagan sa mabulukon nilang karera  nga milanat og  dul-an  sa  duha  na  ka dekada.

Kanhi teammates sa Miami Heat diin sila nakasagunson og duha ka kampiyonato niadtong 2012 ug 2013, ang duha ka superstars nag-abot sa katapusang higayon kagahapong adlawa gumikan kay si Wade moretiro na man human sa 2018 season.

Sa ika-31 nilang engkuwentro, si James maoy midominar kay si Wade nalimitahan ngadto lamang sa 15 puntos.

Ang daog sa Lakers nagpasabot nga si James mitapos uban ang 16 ka daog batok sa 15 ni Wade sa ilang head-to-head match-up.

Human sa duwa, naggakos sila si James ug Wade ug nagbinayloay sa ilang uniporme timaan sa taas nilang respeto sa usag-usa.

Sa laing duwa, si Stephen Curry mipabuhagay og 38 puntos sa dihang ang Golden State Warriors mipakaging sa Minnesota Timberwolves, 116-108  aron inaton ang ilang record ngadto sa 19-9.

Ang Oklahoma City Thunder hinuon karon maoy naghari sa Western Conference bitbit ang 17-8 nga baraha human gipilde ang Utah Jazz, 122-113  ubos sa pagpangu nilang Paul George ug Russell Westbrook.

Si George mihipos og 31 puntos, samtang si Westbrook mitali sa ikaunom niyang triple double karon nga season uban ang 12 puntos, 11 ka rebounds ug 10 ka assists.

Sa Philadelphia, si Joel Embiid miposte og 24 puntos sa dihang   ang 76ers mibuntog sa  Detroit Pistons, 116-102.