Alaska dako'g purohan mokulit sa ikaunom nga daog

CEBU, Philippines – Dako'g purohan nga modaog sa ikaunom nga higayon ang  Alaska Aces gumikan kay ang ilang sangkaon  mao man ang wala pa'y daog nga Columbian Dyip sa pagpadayon sa PBA Governors Cup karong adlawa didto sa Cuneta Astrodome. 

Sugdan ang duwa sa alas-4:30 sa hapon.

Ang Aces nga  tuyong  makabaton og  'twice-to-beat' advantage sa playoffs, nahimutang sa ikaupat nga dapit sa standing uban ang 5-2 nga baraha. Nagsunod sila sa Blackwater (6-2), Ginebra (7-2) ug Magnolia (7-1).

Ang Aces aduna pa'y nahibiling tulo ka duwa ug kun maharos kini nila, dako ang ilang kahigayonan nga masulod sa top 2.

Human sa ilang sikit kaayong kapildihan ngadto sa Magnolia Pambansang Manok niadtong Sabado, ang Aces gilauman nga   mamawi karon, ilabi na sa import nilang si Mike Harris nga miiskor og 24 puntos nga ubos sa iyang average nga dul-an sa 30 puntos karon nga conference.

Samtang sa main game sa alas-6:45 sa gabii, magsangka ang NorthPort Batang Pier  ug ang Rain or Shine Elasto Painters.