Dragons nagkayo luyo sa 'triple-double' ni Belande
CEBU, Philippines — Mirehistro og 'triple-double' si Niño Belande uban ang 24 puntos, 13 ka assists ug 13 ka rebounds alang sa Fusion BPO Services Dragons nga miihaw sa Wipro Tigers, 94-78 ubos sa Elite Classic sa Tanduay Athletics E-Leagues for Basketball niadtong Domingo diha sa City Sports Club-Cebu gym sa Cebu Business Park.
Misidlak sab si Aldrin Fernandez nga mikamada og 31 puntos, samtang sila si Justine Marie Mier ug Janille Kristian Bantilan nagkumbinar og 30 puntos alang sa Dragons nga mikulit sa ikatulo nila nga daog sud sa walo ka duwa.
Sa laing aksiyon sa Elite Classic, si Jan Michael Auditor miposa og 23 puntos ug si Earldred Cesar Montilla miamot og 16 puntos sa dihang gipakaging sa Sykes Pioneers ang Telstra-Teletech Boomerangs sa iskor nga 90-75 aron pag-inat sa ilang rekord ngadto sa 7-2. Ang Boomerangs nakatilaw sa ika-10 nilang sagunson nga pilde.
Sa EVO League, ang Dyninno Jets milampurnas sa CTC-BPO Panthers, 77-59, samtang ang The Results Manila Spartans mikastigo sa Bombardier Grey Wolves, 81-61.
Si Rainier Dominic Obenza mikolekta og 24 puntos, si Igor Cebatori mitali og 15 puntos ug si Antonio Reyes dunay 10 puntos alang sa Jets nga naghupot na karon og 4-1 nga baraha, samtang si Jade Seno mipabuto og 29 puntos alang sa Spartans nga naglukdo na karon og 3-2 nga marka. (BANAT NEWS)
- Latest
