UC Jrs. milatos sa CIT-U
CEBU, Philippines — Si Joshua Gellacone mitagak og 14 sa iyang 19 puntos sa first half sa dihang gilampornas sa University of Cebu (UC) Junior Webmasters ang Cebu Institute of Technology-University (CIT-U) Wildkittens, 64-45, sa 18th Cebu Schools Athletic Foundation, Inc. (CESAFI) men's basketball tournament kagahapon diha sa Cebu Coliseum.
Misalida sab sila si Isaiah Blanco, anak ni PBA star Dondon Hontiveros, Joshua Pacaña ug James Incio alang sa Junior Webmasters, nga milansang sa ikaupat nilang sagunson nga daog ug ikalima sa kinatibuk-an sud sa unom ka duwa aron sa padayon nilang pagsolo sa ikaduhang puwesto sa liderato.
Ang Wildkittens nasugamak ngadto sa 2-4.
Si Gellacone milansang og duha ka hagpok nga tres ug sila si Blanco ug Pacaña miposa sab og tagsa ka 3-pointer nga maoy nagtuboy sa Junior Webmasters ngadto sa mainit nga sinugdanan hinungdan nga nakalabaw dayon sila og 16 puntos, 21-5.
Abante gihapon sa halftime, 30-21, ang Junior Webmasters mi-inat sa ilang labaw ngadto sa 15 puntos, 38-23, ug ang Wildkittens igo lamang nakasikit sa iskor nga 36-43 sa naghinapos nga bahin sa ikatulong kuwarter.
Gi-angklahan dayon sa Junior Webmasters ang Wildkittens ngadto lamang sa siyete puntos sa katapusang hunat sa duha samtang sila mikadlit og 17 alang sa 19 puntos nga demolisyon.
Sa sayo pa, si Allan Jones Ruiz mibubo sa tanan niyang 16 puntos sa second half apil na ang upat ka tres aron pangulohan ang University of San Carlos (USC) Baby Warriors ngadto sa 59-53 nga kadaogan batok sa Don Bosco Greywolves.
Ang Baby Warriors nagbitbit na karon og 3-1 nga baraha samtang ang Greywolves nagpabiling bokya sa lima ka duwa. (BANAT NEWS)
- Latest
