CEBU, Philippines – Human nilang Manny Pacquiao (WBA welterweight) ug Jhack Tepora (WBA Interim featherweight), lain na sab nga Pinoy'ng boksidor ang nagpanikad nga ma-world champion.
Kini human ang International Boxing Federation nimando ni Randy Petalcorin sa Sanman Boxing Gym nga nagbase sa General Santos City nga makigbinukbukay ni Felix Alvarado sa Nicaragua alang sa bakanteng IBF light flyweight title.
Nakab-ot sa IBF ang maong desisyon sa dihang si Hekkie Budler sa South Africa boluntaryong mihubo sa bakus nga iyang nasakmit human midaog pinaagi sa unanimous decision batok sa Hapon nga si Ryoichi Taguchi niadtong Mayo 20 didto sa Ota-City Gymnasium sa Japan.
Isip maoy top 2 contenders sa ilang dibisyon, sila si Petalcorin ug Alvarado mao ang gihatagan og mando sa IBF nga maoy mag-ilog sa bakanteng trono. Ang 26-anyos nga si Petalcorin dunay 29-2-1 record uban ang 22KOs, samtang si Alvarado, 29-anyos nagkupot og 33-2 nga baraha uban ang 29KOs. Si Sanman Promotions CEO Jim Claude Manangquil mipasalig nga ilang lihukon ang negosasyon sa labing dali nga panahon aron maluto dayon ang maong sangka.