CEBU, Philippines – Gipapirma'g balik og kontrata sa Dallas Mavericks si Dirk Nowitzki hinungdan nga ang German All-Star forward mikulit og rekord isip labing unang player sa kasaysayan sa NBA nga moduwa sud sa 21 ka sagunson nga season sa usa lang ka team.
Gipapas ni Nowitzki ang karaang rekord nga gikuptan ni Kobe Bryant nga nakasilbe sud sa 20 ka tuig uban sa Los Angeles Lakers.
Wala hinuon gidetalye sa Mavericks kon unsay nalatid sa bag-o nilang kasabotan ni Nowitzki.
Si Nowitzki maoy No. 9 overall pick sa 1998 NBA Draft ug nakuha sa Mavericks pinaagi sa usa ka trade uban sa Milwaukee Bucks.
Trese ka higayon nga nahimong NBA All-Star, si Nowitzki maoy labing ngilngig nga player sa kasaysayan sa Mavs. Gibayaw siyang Most Valuable Player niadtong 2006-2007 season ug MVP sa 2011 NBA Finals.
Ang 40-anyos nga si Nowitzki mao lang ang langyaw nga player sa liga nga nakahipos og kapin sa 30,000 career points.