CEBU, Philippines — Andam na ang tanan alang sa ika-23 nga season sa Sacred Heart Ateneo Alumni Basketball Athletic Association (SHAABAA) nga gikatakdang mosikad karong Hulyo 29 diha sa Magis Eagles Arena sa Sacred Heart School-Ateneo de Cebu sa Barangay Canduman, dakbayan sa Mandaue.
Gipabuhagay ni SHAABAA President Clement Gothong nga ning higayon mosabay sila sa modernong teknolohiya gumikan kay ang ilang mga duwa duna nay live video streaming pinaagi sa Cebu Sports LIVE.
“We have to keep up with the latest trend of technology that is why we are coming up with this live streaming for our games,” dason pa ni Gothong atol sa pormal nga paglusad sa ilang event sa miaging gabii didto sa Veranda Resto Bar sa Parkmall.
Sa karon nga edisyon sa tinuig nilang torneyo, si Gothong nagkanayon nga ila sab gibalik ang ilang solid batch rule. Kini nagpasabot nga ang usa ka player makaduwa didto gyud sa batch nga siya nasakop.
Sa kinatibuk-an, miabot ngadto sa 25 ka teams nga gibahig sa tulo ka dibisyon ang mopakita'g aksiyon.
Magtigi sa Division A mao ang mga magduduwa gikan sa batch ’89 hangtud sa 98, ang Division B alang sa batch 2000 ngadto sa 2007, ug ang Division C naglangkob sa batch 2008 ngadto sa 2015.
Ang mga duwa ubos sa superbisyon ni tournament commissioner Robert Rafson Chua. (BANAT NEWS)