Melo mahimong free agent
CEBU, Philippines – Mamahimo na nga usa ka 'free agent' si Carmelo Anthony human siya maoy nasentro sa usa ka 3-team NBA trade nga naglangkob sa Oklahoma City Thunder, Atlanta Hawks ug Philadelphia 76ers.
Ang 34-anyos nga forward, 3-time Olympic champion uban sa Amerika ug 10-time NBA All-Star, bayran sa entiro niyang $27.9 million nga kontrata ug duna siya'y kagawasan nga motapon sa bisan unsang team. Gikataho nga ang Houston Rockets maoy labing interesado nga mokuha kaniya.
Matud pa sa ESPN ug Yahoo Sports, ang nahitabong pagbinayloay og players maghatod ni Anthony gikan sa Thunder ngadto sa Atlanta uban ang 2022 first-round NBA Draft pick puli nilang German guard Dennis Schroder ug forward Mike Muscala.
Paliton dayon sa Hawks ang kontrata ni Anthony ug i-release siya hinungdan nga mamahimong free agent si Melo.
Kabahin sa kinatibuk-ang kasabotan, si Muscala molayat sa 76ers ug dayon ang Philadelphia mopadala nilang forward Justin Anderson sa Atlanta ug French swingman Timothe Luwawu-Cabarrot ngadto sa OKC.
Si Anthony mi-average og 16.2 points ug 5.8 rebounds matag duwa nga maoy labing ubos sa iyang karera sa miaging season uban sa Thunder diin iyang nakauban si Paul George ug 2017 NBA Most Valuable Player Russell Westbrook.
Kun ugaling mahingpit na ang iyang pagbalhin sa Rockets, si Anthony makig-uban sa koponan nga usa na lang unta ka daog ang gikinahanglan batok sa Golden State Warriors aron makataak sa NBA Finals. Moporma sab dayon unya siya og laing 'superteam' uban nilang 2018 NBA MVP James Harden ug Chris Paul.
- Latest
