Talisay nakauna, mosuway og sakmit sa korona karon

CEBU, Philippines —  Nagkumboya'g 70 puntos sila si Jay Deiparine, Keaton Clyde Taburnal ug Elmer Echavez alang sa Talisay City Aquastars nga milubong sa San Francisco, 89-68 aron pagposte og 1-0 nga bentaha sa ilang best-of-three finals series sa Cebu Governor's Cup Inter-Cities and Municipalities Under-21 Developmental Basketball Tournament niadtong Lunes sa gabii didto sa Talisay City Sports Complex.

Mahimo nang birahon sa mga Talisaynon ang korona kun  ilang mapilde pag-usab ang ilang karibal, apan angayan silang mangandam sa usa ka dakong gubat gumikan kay ang San Francisco mao man ang mo-host sa Game 2 karong gabii didto sa SanFran municipal gym sa isla sa Camotes.

Sugdan ang aksiyon sa alas-7 sa gabii. Ang Game 3  kun gikinahanglan, duwaon karong Hulyo 20 sa Cebu Coliseum.

Si Deiparine mitapos uban ang 25 puntos, si Echavez mitali og 23, samtang si Taburnal mibugha og 22 puntos alang sa Talisay nga  sayo kaayong miabante,  27-9.

Sila si Taburnal ug Echavez miiskor og 14 puntos matag usa sa first half nga miresulta ngadto sa 46-27 nga bentaha sa Talisay atol sa halftime.  Misalida sab dayon si Deiparine pinaagi sa pag-iskor og 16 puntos sa final half.

Ang SanFran igo lamang nakasikit ngadto sa 12 puntos, 52-64  human sa tulo ka kuwarter luyo sa paningkamot sa  star player nilang si Kenny Rocacurva gumikan kay ang Talisay mitak-op sa duwa pinaagi sa  25-14 run aron pagsilyo sa 21 puntos nilang daog.

Si Rocacurva maoy nangu sa SanFran uban ang 17 puntos.

Sa sayo pa, si Emmanuel Villamor mipabuto og 31 puntos sa dihang gilampaso sa Consolacion Sarok Weavers ang Sibonga Pillars, 112-91 aron pagpahiluna sa ikatulo nga dapit.

Ang Consolacion mibulsa og P200,000, samtang ang Sibonga  nga nakapasol og 23 puntos gikan ni Ehman Ronen Suarez, nakadawat og P100,000.