CEBU, Philippines — Gipadayag ni Top Rank Inc. CEO Bob Arum nga may angay kabalak-an ang mga nagpaabot sa pagbalik og saka sa ring ni Manny Pacquiao batok Argentinean champion Lucas Matthysse sa Hulyo 15 didto sa Malaysia.
Si Arum nagkanayon nga nagpaabot pa ang kampo sa WBA welterweight champion nga si Matthysse sa dugang bayad human siya giunhan og $500,000. Si Matthysse midawat sa sangka ni Pacquiao human gisaaran og $2 million.
Nasayran nga si Arum igo nalang motabang sa promotional airing sa away ni Pacquiao didto sa US ug wala na kini katungod nga mudala sa tibuok promosyon sa sangka human usab si Pacquiao ang mihukom nga ang MP Promotions na ang mudala sa away.
“I don’t know what’s going to happen with the fight,” matud pa ni Arum sa ESPN.com. "Unless money is in the bank, Matthysse may choose not to climb the ring."
Gawas sa bayad ngadto ni Matthysse, si Arum miingon nga naapeke na usab ang mga shooting kabahin sa promosyon sa away sa ESPN nga mopasalida niini pay-per-view. Kung gamay og kita ang pay-per-view, segurado si Arum nga maalkanse ang promosyon ug posible nga dakung suliran sa kwarta ang sagubangon sa MP Promotions. (BANAT NEWS)