CEBU, Philippines — Kay wala pa'y klaro kun unsay iyang ugma uban sa Cleveland, padayong abli ang linya sa komunikasyon ni LeBron James ngadto sa Cavaliers pinaagi sa iyang mga representante.
Human sa NBA Draft niadtong Biyernes, si Cavs general manager Koby Altman mibutyag nga nagmabungahon ang ilang panag-estorya uban sa kampo ni James.
Ang four-time NBA MVP ug three-time champion gihatagan hangtod sa Hunyo 29 aron modesider kun tahuron ba ang nahibilin niyang kontrata sa Cavs nga mibalor og $35.6 million o mosud ba siya sa free agent market.
Human gi-sweep sa Golden State Warriors ang Cavs sa miaging NBA Finals, si James mipadayag sa iyang interes nga motapon og laing team nga adunay dako og tsansa nga makahatag kaniya og laing kampiyonato.
Kun ugaling makahukom si James nga mobiya sa Cavs ug mamahimong usa ka free agent, daghan ang mag-ilog sa gitamod nga labing maayong basketball player karon sa kalibotan. Nag-una nga mokuha sa iyang serbisyo mao ang Philadelphia 76ers ug LA Lakers, gusto sab mokuha ni James ang New York Knicks, Houston Rockets ug San Antonio Spurs.