CEBU, Philippines – Ang Phoenix Suns migamit sa labing unang No. 1 overall pick sa kasaysayan sa ilang prangkisa aron pagkuha sa higanteng Bahamian nga si Deandre Ayton sa 2018 NBA Draft nga gipahigayon kagahapon didto sa Barclays Center sa Brooklyn, New York.
Gipaabot nang daan sa kadaghanan nga birahon sa Suns ang 19-anyos nga si Ayton gumikan sa gidak-on ug gitas-on niining pito ka tiil nga iyang gipahimuslan aron dominahon ang US college basketball sa miaging season uban sa Arizona Wildcats.
"It means the world to me, you know my family and coaches know the hard work I put into this game to really try and be successful and achieve all my goals," matud pa ni Ayton, kansang abilidad gitandi kang Shaquille O'Neal.
Nanghinaut ang Suns nga unta si Ayton makapausab sa dagan sa ngil-ad nilang kampanya sa miaging season diin ang Suns mitala lamang og 21 ka daog batok sa 61 ka pilde.
Si Ayton nga mag-20 anyos sunod bulan, nanghinaut nga sa ilang panag-uban ni Devin Booker mamunga og kaayohan alang sa Suns sama sa gibuhat nilang O'Neal ug Kobe Bryant sa LA Lakers.
Human ni Ayton, ang Sacramento Kings mikablit ni power forward Marvin Bagley isip No. 2 pick overall, samtang si Luka Doncic sa Slovenia gibira nga No. 3 sa Atlanta Hawks.
Gawas nilang Ayton ug Bagley, lain pang mga 'bigmen' nga gi-draft mao sila si Wendell Carter (Chicago Bulls), Jaren Jackson (Memphis Grizzlies) ug Mohamed Bamba (Orlando Magic).
Related video: