CEBU, Philippines – Dili na motugot ang Gilas Pilipinas nga mapilde pa sa PBA All-Star selection sa ilang sangka sa Luzon All-Stars karong gabii didto sa Batangas City.
Ang Gilas napilde sa Mindanao All-Stars,130-144 niadtong Miyerkules didto sa Davao del Sur.
Si national team center JuneMar Fajardo miingon nga maning-kamot sila nga modaog karon aron ipakita nga andam na sila sa ilang sa FIBA World Cup qualifiers sa sunod buwan.
Modala sa Gilas mao ang multi-titled coach nga si Yeng Guiao, kinsa mipasalig nga dili na mausab ang nahitabo sa Gilas batok sa Mindanao All-Stars.
Gawas ni Fajardo, saligan sab sa Gilas sila si Carl Bryan Cruz, Troy Rosario, Mac Belo, RR Pogoy, Allein Malicsi, Terrence Romeo, Gabe Norwood, Jio Jalalon ug Kiefer Ravena.
Lisud ang tahas sa national team tungod kay moduwa batok kanila ang Gilas mainstays sa PBA All-Stars nga sila si Jayson Castro, Japeth Aguilar, Matthew Wright ug Calvin Abueva.