Duha ka veteran imports balik duwa sa PBA

CEBU, Philippines – Kuhaon og balik sa TNT KaTropa ug Phoenix  Fuel  Masters  ang   ilang  elite  import aron molig-on pa og maayo ang ilang puwersa sa nagpadayong  2018  PBA Commissioner's Cup.

Human papaulia si ex-NBA cager  Jeremy Tyler, ang TNT nga nag-una karon sa standing sa ilang 4-1 mopaduwa pagbalik sa higanteng si Joshua Smith. Ang 6-foot-10 nga si Smith maoy import sa TNT sa miaging tuig diin  gigiyahan niya ang koponan paingon sa finals.

Si Smith saligan ni coach Nash Racela sa ilawom nga bahin sa ring aron makabuwelo ang iyang mga gunners sama nila ni Jayson Castro, Terrence Romeo ug RR Pogoy.

Sa ilang bahin, ang Phoenix mikuha sab pagbalik sa high-scoring import nga si Eugene Phelps hulip ni James White, kinsa na-injury.

Si  Phelps  mopakita dayon   og   aksiyon  atol sa  duwa sa Phoenix batok Barangay Ginebra Kings karong alas-6:45 sa gabii  didto  sa Smart Araneta Coliseum.

Sa dili pa ang sangka sa Phoenix ug Ginebra, magharong una ang Rain or Shine Elasto Painters ug GlobalPort Batang Pier sa alas-4:30 sa hapon.