CEBU, Philippines — Sud sa dugay na nga katuigan, sa katapusan si Ricky Vargas midaog na gyud ug mao na ang bag-ong presidente sa Philippine Olympic Committee (POC).
Kini human si Vargas midaog sa gimando nga POC election sa korte batok ni Jose ‘Peping’ Cojuangco kagahapon.
Si Vargas, ang kanhi hepe sa Association of Boxing Alliances in the Philippines, nakakuha og 24 botos, samtang si Cojuangco nakakuha lamang og 15 botos.
Kini ang pagkatapos sa 13 ka tuig nga paghupot ni Cojuangco sa maong katungdanan.
Daghan ang gusto nga mopuli ni Cojuangco tungod sa nagkaubos nga kalidad sa sports sa nasud, apan bugtong si Vargas ra ang nakapilde kaniya.
Sa iyang pagdaog, si Vargas nga uban ni sports patron Manny V. Pangilinan nga mipalig-on sa Samahang Basketbol ng Pilipinas alang sa Gilas, nagkanayon nga gusto niya nga maundang na ang politika ug angay na nga molihok dayon alang sa pagpalambo sa sports sa nasud.
Gusto sab ni Vargas nga mopokus alang sa pag-host sa Pilipinas sa umaabot nga 2019 Southeast Asian Games.
Si Cycling president Bambol Tolentino mao usab ang bag-ong chairman sa POC hulip sa kaalyado ni Cojuangco nga si Ting Ledesma.