CEBU, Philippines — Ang buzzer-beater fade-away jumper ni Al Horford maoy nag-aswat sa Boston Celtics ngadto sa kulbahinam nga kadaogan batok sa Portland TrailBlazers, 97-96 sa NBA kagahapon didto sa Boston Garden sa Massachusetts.
Sa wala pa ang iyang pagkamabayanihon, sila si Horford, Semi Ojeleye ug Jayson Tatum miposa sab og tulo ka sagunson nga tres sa 11-0 run sa nanghinapos nga bahin sa fourth quarter nga maoy nakapalabaw sa Celtics human maalkansi og sayes puntos, 85-79.
Matud pa ni Horford nga ang teammate niyang si Jaylen Brown mao unta ang mobuhi sa katapusang itsa, apan natabonan kini hinungdan nga siya na lang maoy mitira.
Si Horford mitapos uban ang 22 puntos ug 10 ka rebounds sa Celtics nga miposte sa ikaupat nilang sunod-sunod nga daog. Sila si Tatum ug Brown nagkumboya’g 33 puntos nga dako og natabang pag-inat sa ilang rekord nga 39-15.
Sa laing duwa, ang Milwaukee Bucks mipilde sa Brooklyn Nets 109-94 bisan og wala ang bitoon nilang si Giannis Antetokounmpo nga mibiya sa duwa sa katapusang kuwarter tungod sa injury sa tuo niining tiil. Dili ra hinuon seryoso ang injury.
Si Eric Bledsoe mi-iskor og 28, samtang si John Henson mihipos og 19 puntos sa Bucks nga miinat sa nagkadina nilang daog batok sa Nets ngadto sa 10 ka duwa. Nagkupot na sila karon og 6-1 record human gipalagpot si coach Jason Kidd.
Sa laing mga resulta, si Delon Wright mipupo og 15 puntos aron tabangan ang Toronto Raptors paglubong sa Memphis Grizzlies, 101-86, si Russell Westbrook mipabuhagay og 36 puntos, apan ang Oklahoma City Thunder gihamok sa ilang turnovers hinungdan sa ilang 104-108 nga kapildihan batok sa Los Angeles Lakers. (BANAT NEWS)