James, Love bida sa Cavs
CEBU, Philippines — Parehong mikulit og ‘double-double’ sila si LeBron James ug Kevin Love alang sa Cleveland Cavaliers nga mibuntog sa Atlanta Hawks, 121-114 alang sa ika-10 nilang sunod-sunod nga daog sa National Basketball Association kagahapon didto sa Philips Arena sa Atlanta, Georgia.
Si James miiskor og 24 puntos uban ang 12 ka assists ug unom ka rebounds, samtang si Love mitimbre og 25 puntos ug 16 ka rebounds alang sa Cavs nga miinat sa ilang rekord ngadto na sa 15-7. Ang Hawks natagak ngadto sa 4-17.
Dako sab og naambag si Dwyane Wade nga mitali og 19 puntos ug ingon man sila si Jae Crowder ug Jeff Green nga nagkumboya’g 27 puntos.
Si Dennis Schroder maoy nangulo sa Hawks bitbit ang 27 puntos, samtang si Ersan Ilyasova mihipos og 22 puntos sa pilderong koponan.
“I take a lot of pride in my defensive abilities no matter if I'm guarding a point guard, a power forward, a center or a small forward. I take the challenge,” matud pa ni James, kansang Cavs wala na molingi pa sukad miposte og 99-90 nga labaw human sa tulo ka kuwarter.
“My teammates wanted me to take the challenge and I wanted to take the challenge.”
Gawas sa eksplosibo niyang opensa, si Cavaliers coach Tyronn Lue midayeg sab sa depensa ni James ilabi na kay iyang napugngan si Schroder hinungdan nga wala kalupad ang Hawks. (BANAT NEWS)
- Latest
