CEBU, Philippines — Sa tuyo nga makatigom og salapi aron itabang sa mga kabataan gikan sa kabus nga mga pamilya, ang Kid’s Hope Foundation mopasiugda og charity run nga giulohan og “Hope Run” sa Disyembre 10 diha sa Pescadores Road sa Cebu Business Park.
Ang lumba gibahin sa lima ka kategoriya -- 1.5K, 3K, 5K, 10K ug 21K.
Nagtinguha ang organizers nga makuha nila ang target nga 3,000 participants human sa malampuson nilang Manila leg nga miabot og 6,000 runners ang nidagan.
“This is our first run in Cebu, we had our first Hope Run in Manila. We are so grateful that we are able to stage the Hope Run here because our main goal is to extend our help to the kids who have special needs here in Cebu,” matud pa ni Aileen Ang sa Kid’s Hope foundation.
Ang registration fee nagkantidad og P600 sa 1.5K, P700 sa 3K ug 5K, P1,000 sa 10K ug P1,200 sa 21K. Mahimong magparehistro didto sa Kidzoona branches sa SM Seaside City, SM Consolacion ug Robinsons Galleria Cebu ug sa Runnr sa Ayala Center Cebu ug Toby's Sports. (BANAT NEWS)