CEBU, Philippines — Mibawos ang twice-to-beat E&F Surplus ngadto sa GT Cosmetics, 78-72 sa tagakay nga quarterfinals sa 9th J&J Surplus Ballclub basketball tournament niadtong Martes sa gabii didto sa GT Academy gym sa Barangay Tayud, Lilo-an.
Dili hinuon sayon ang misyon sa E&F Surplus kay sila man ang kanunay naggukod halos sa kinatibuk-ang duwa ug diha na sila milabaw sa hingpit sa daginutong minutos sa katapusang kuwarter kortesiya ni Tata Betinol.
Ang team owner mismo nga si Fury Trazona ang nangulo sa kadaogan nga miratsada og 19 puntos, gisundan ni Anton Tranghia nga adunay 15 puntos, samtang si Betinol miamot og 13 puntos ug si Tingan Gestopa miabuno’g 12 puntos sa maong E&F Surplus nga miabante na sa semifinals.
Upat sab ka players sa GT Cosmetics ang miiskor og double figures sa pagpangulo ni William Alegado pinaagi sa iyang 25 puntos.
Nagdanga-danga na unta ang GT Cosmetics sa kadaogan human sila milabaw og singko puntos, apan ang E&F Surplus milusad og trapping defense nga maoy katapusan nilang alas aron modiga og daog.
Si Rex Berandal mitampo og 16 puntos, samtang sila si Vincent Pepito ug Edmund Cañete nagkumboya’g 21 puntos sa natagak nga GT Cosmetics.
Sa lain pang aksiyon, ang GT Cool Mommies milansang og daog batok sa A&G Blizzard aron pagpuwersa og ‘do-or-die’ quarterfinals.
Nagkumbinar og 24 puntos sila si Almer Icot ug Kevin Patalinghug aron mangulo sa opensiba sa GT Cool Mommies.
Ang A&G Blizzard gipangulohan sab ni Francis Suico nga mipupo og 26 puntos, apan nakawang lang ang iyang mga paningkamot kay wala kini makapadaog sa koponan.
Si Rommel Bucatan mitikdol og 23 puntos, samtang si Jymwheel Torregosa mitimang og 11 puntos sa A&G Blizzard nga may purohan pang moabante sa semifinals kun ilang mapilde ang GT Cool Mommies sa tagakay nga duwa nga kasamtangan giduwa sa pagsulat niini kagabii.
Ang liga nga nahimo pinaagi sa paningkamot sa presidente niining si Henry Agbon, gipadagan ni commissioner Fury Trazona.
Puntos matag usa
Unang duwa:
E&F Surplus (78) – Trazona 19, Tranghia 15, Betinol 13, Gestopa 12, Igoy 8, Nuñez 5, A. Sabang
3, Caballes 3, Palo 2, K. Sabang 2, Pepito 2, Ponce 2.
GT Cosmetics (72) – Alegado 25, Berandal 16, Pepito 11, Cañete 10, Ybañez 3.
Ikaduhang duwa:
GT Cool Mommies (71) – Icot 14, Patalinghug 10, Ponce 9, Apas 4, Veronilla 4, Lascuna 4.
A&G Blizzard (66) – Suico 26, Bucatan 23, Torregosa 11, Borres 2, Apostol 2. (BANAT NEWS)