CEBU, Philippines — Daw sa nag-alburoto na ang pamati sa Top Rank gumikan kay giawhag na niini ang ilang boksidor nga si Manny Pacquiao nga modesider na kun hingpit na ba kining moretiro ug magpadayon pa sa iyang karera sa boksing.
Kini gumikan kay matud pa ni Top Rank President Todd DuBoef, nga ang potensiyal nga mga kontra ni Pacquiao sa welterweight division dili na makapaabot pa ni Pinoy ring star kun kanus-a kini makaluwat sa iyang desisyon.
Sa dihang nahinabi ni John Dennen sa boxingnewsonline.net, si DuBoef mitug-an nga hangtod karon nagpaabot pa sila kun unsay sunod nga lakang sa eight-division world champion.
Sayod si DuBoef nga adto gibubo ni Pacquiao karon ang iyang panahon sa politika ilabi na kay bug-at nga papel ang gihuptan niini isip senador sa Pilipinas.
Sukad gihukasan sa iyang bakus isip WBO welterweight champion ni Jeff Horn niadtong Hulyo 2 didto sa Brisbane, Australia, si Pacquiao wala na mipadayag kun unsay sunod niining direksyon sa dalan nga iyang gibaktas sa boksing.
Mao nang gusto si DuBoef nga masayod kun unsay dagan sa huna-huna ni Pacquiao aron makasugod na sila og lantaw sa uban nilang opsiyon. (BANAT NEWS)