CEBU, Philippines — Ang iladong junior triathlete nga si Kim Remolino mao ang migawas nga labing dakung mananaug sa 6th Gullas Run kagahapon didto sa Talisay City Hall grounds.
Si Remolino midaog sa 17-under division. Gitapos niya ang lima ka kilometro nga rota sud lang sa 17 minutos ug 27 segundos. Gipilde niya si Alfred Pacabis (19:46), samtang si Justice Saosa maoy anaa sa ikatulong dapit.
Sa women's division, si Nenita Buhad maoy gikoronahan nga reyna uban sa mga runners-up nga sila si Maria Lyka Bacus ug Analyn Sabuag.
Ang laing triathlete nga si Karen Manayon midaog usab sa 16-under batok nila ni Marielle Estreba ug Marife Pepito, samtang si Renz Corbin mao ang kampiyon sa boys 16-under uban sa mga runners-up nga sila si John Philip Kong ug Nico Estreba.
Naghari sa 19-above class si Boboy Dolen, samtang si Jeanna Canete maoy daog sa women's class.
Sila si Wincy Pagnanawon ug Ann Perez maoy midaog sa 3K under-12 division. Si Pagnanawon mirehistro og oras nga 21:30 alang sa kampiyonato gisundan nila ni Kenshie Luke Cabando (22:40) ug John Patrick Rabaya (24:47).
Si Perez sa iyang bahin adunay oras nga 20:19 gisundan nila ni Myrhh Frankincense Largosa (23:38) ug Rhexiel Belong (29:40). (BANAT NEWS)