CEBU, Philippines - Nanghinaut si Mary Joy Tabal nga motunol sa labing unang gold medal sa Pilipinas sa 29th Southeast Asian (SEA) Games sa dihang ang Cebuana Olympian mokumbati sa women’s marathon sayo karong buntag didto sa Bukit Jalil National Stadium sa Kuala Lumpur, Malaysia.
Ang 27-anyos nga si Tabal nga mikulit og kasaysayan isip labing unang Pinay marathoner sa Olympics didto sa Rio de Janiero, Brazil sa miaging tuig, miingon nga napresyur siya ug sa susamang higayon tumang kahinam sa tahas nga nagpaabot kaniya sa unahan.
Kon ugaling molampos, mao kini ang labing nindot niyang performance sa usa ka international competition.
Apan labaw sa paghimo sa iyang silver medal niadtong 2015 Singapore SEA Games ngadto sa bulawan, si Tabal misaad nga buhaton tanan kutob sa iyang mahimong aron makahatag og garbo ug dungog sa yuta niyang natawhan.
“It’s a bit pressure but I’m excited to do it for our country,” tubag pa ni Tabal sa dihang gipangutana sa posibilidad nga siya maoy makamina sa unang gold sa nasud ning 10 ka adlaw nga torneyo nga mahitabo kausa lamang sa duha ka tuig.
Gumikan sa iyang mga nakab-ot nga naghatod kaniya ngadto sa prestihiyosong marathon sa Boston, Los Angeles ug Paris, taas ang pangagpas sa kadaghanan ngadto sa garbo sa Barangay Guba, Cebu City.
Apan si Tabal mipadayag sa iyang kaandam nga mosagubang sa bisan unsang hagit nga iyang masugatan.
“I also know that you cannot predict on what will happen during the competition but I made myself ready for everything. I am hoping that I can deliver everything I have been training,” pasalig sa rayna sa marathon sa nasud sulod sa milabay’ng upat ka tuig. (BANAT NEWS)