CEBU, Philippines - Nagtinguha ang Barangay Ginebra nga moiskor sa ikapito nilang daog aron makuha ang no. 2 spot ug makuha ang “twice-to-beat” advantage sa quarterfinals sa PBA Commissioner’s Cup.
Ang Ginebra (6-2) makigharong sa Blackwater Elite (2-7) karong alas-7 sa gabii human sa duwa tali sa GlobalPort Batang Pier ug Rain or Shine Elasto Painters.
Ang Gin Kings nagsunod sa topseed nga Star Hotshots (8-2) ug ang daog karon mopahiluna kanila sa ikaduhang dapit. Apan kun mapilde, ang Ginebra matagak sa ikaupat sunod sa Meralco Bolts ug TNT KaTropa nga pulos adunay 7-3 nga baraha.
Hinuon, si Ginebra coach Tim Cone kompiyansa nga molampos sila dili tungod kay huyang ra alang kanila ang Blackwater, kun dili tungod kay anaa kanila ang momentum human sa daku nilang kadaugan batok sa San Miguel Beermen niadtong Domingo.
Sama sa gihapon, si Cone mosandig sa iyang best import nga si Justin Brownlee uban ang mga lokal nga sila si Japeth Aguilar, LA Tenorio, Joe Devance, Scottie Thompson ug Sol Mercado. (BANAT NEWS)