CEBU, Philippines - Sa ikaduha pa lamang niya nga season isip pro, si Baser Amer mipakita na og kahait sa abilidad sama sa usa ka beterano.
Mao kini ang iyang gipakita sa labing uwahi niyang salida niadtong Miyerkules.
Ang kanhi bitoon sa San Beda mipasud og walo sa 11 niya ka itsa aron pagtapos og 20 puntos uban ang tulo ka assists sa 81-66 nga kadaugan sa Bolts batok sa Phoenix Fuel Masters.
Ang maong kadaugan nagduso sa Meralco ngadto sa solong liderato uban ang 7-1 record ug labaw sa tanan nakapahayag sa ilang tsansa nga makaangkon og twice-to-beat incentive sa playoffs.
Gibansay-bansay ni PBA great Jimmy Alapag nga mao ang karon ang assistant coach sa Meralco, si Amer nahimong PBA All-Star karon nga season human mi-average og 16.5 points, 5.12 rebounds ug 4.25 assists sa PBA Commissioner’s Cup.
Sa eksplosibo niyang dinuwaan, ang 24-anyos nga si Amer maoy gipasidunggan nga Accel-PBA Press Corps Player of the Week. (BANAT NEWS)