CEBU, Philippines - Masilotan na ang mga tawo o establisemento sa Siyudad sa Talisay nga mga hugawan o dili manglimpyo sa ilang palibot nga maoy hinungdan nga modaghan ang itloganan sa lamok nga nagdala sa sakit nga dengue.
Giaprubahan sa konseho ang ordinansa nga gipangamahanan ni Konsehal Richard Francis “Choy” Aznar nga maoy chairman sa Committee on Health sa siyudad.
Matud ni Aznar nga kinahanglan gyud nga manglimpyo sa palibot aron malikay sa mga sakit ilabi na sa dengue.
Ang Anti-Dengue Task Force maoy tahasan sa pagpahibawo sa katawhan nga ingon ana na ang bag-ong palisiya nga gipatuman sa dakbayan.
Sila maoy manglista sa mga tawo nga makalapas sa maong ordinansa aron mapahamtangan og tukmang silot. Ang labing taas nga silot mao ang pagmulta og P3 mil.
Subay sa maong kalambuan, gihangop kini ni Dr. Lino Alanzado, ang pangulo sa Talisay City Health Office kay daku kini’g tabang sa ilang kampanya batok sa sakit nga dengue.
Asoy niya nga alang kini sa mga tawo nga bisan og unsaon pagpasabot, pabilin gihapon nga mga hugawan o dili makamao molimpyo sa ilang mga palibot.
Sa nasayran, 142 ka kaso na sa sakit nga dengue ang natala sa Talisay ug duha niini ang namatay sulod niining tuiga.
Ug ang Talisay nabutang gihapon sa top 5 base sa datus sa lalawigan sa Sugbo. (BANAT NEWS)