CEBU, Philippines - Ang sumusulbong nga bitoon sa ALA Gym nga si Jeo ‘Santino’ Santisima maoy mokompleto sa line-up alang sa “Pinoy Pride 40: Donnie-Nation” nga gikatakda karong Abril 29 diha sa Waterfront Cebu City Hotel and Casino.
Ang batan-on nga si Santisima makigbinukbukay ni Master Suro (11-8-1) sa Indonesia sud sa 10 ka hugna ubos sa super bantamweight division.
Si Suro mihaw-as gikan sa daog batok sa kababayan niyang si Jack Madison niadtong Pebrero. Nakatilaw na hinuon siya og pilde sa mga kamot ni WBO Oriental lightweight champion Juan Martin Elorde duha ka tuig na ang milabay.
Samtang si Santisima segurado nga magpakitang gilas gumikan kay bag-o pa siya mipirma og kontrata uban sa ALA Promotions.
Si Santisima dunay 12-2 record uban ang 11KOs. Usa siya sa mga gitamod nga mamahimong sunod nga Pinoy world boxing champion.
Mismo si ALA Promotions President ug CEO Michael Aldeguer ang dunay taas nga pagsalig ug kompiyansa ni Santisima nga layo ang maabot nini sa iyang karera sa pamuksing. (BANAT NEWS)