CEBU, Philippines - Misangpot na sa personal nga away ang finals series sa San Miguel Beermen ug sa igsuong koponan Barangay Ginebra.
Sa Game-3 niadtong Miyerkules, si Beermen star Arwind Santos nakigbinayloay og hait nga mga pulong ngadto sa rookie sa Ginebra nga si Kevin Ferrer.
Si Santos miingon nga nahibong siya sa gipakita nga batasan ni Ferrer nga iyang gihulagway nga migara atol sa ilang duwa dihang labaw pa ang Ginebra.
Gawas sa isyu nila ni Santos ug Ferrer, mimugna usab og kasikas ang nahitabong pagkompronta ni Ginebra coach Tim Cone ngadto ni Chris Ross sa San Miguel human sa duwa.
Wala kauyon si Cone sa gibuhat ni Ross nga miitsa pa og tres sa himalatyong segundo sa duwa bisan pa og gilubong na ang Ginebra. Matud pa ni Cone nga walay ‘sportsmanship’ si Ross tungod kay tuyo niini nga makaiskor inay nga molamano sa mga players. (BANAT NEWS)