Beteranong si Bogut mitapon sa Cavs

CEBU, Philippines - Laing kasaligang veteran player  ang milayat sa poder sa defending champion Cleveland Cavaliers human  ang free-agent ug kanhi No. 1 pick nga si Andrew Bogut mopirma og kontrata aron makig-uban ni LeBron James.

Wala pa hinuon ang pormal nga pinirmahay, apan  klaro na  nga  moduwa si Bogut sa Cavs  human usab siya buhii sa Philadelphia 76ers.  Si Bogut gi-trade sa Dallas Mavericks sa Sixers atol sa trade deadline.

Ang Australian center gipangulitawhan dayon sa Boston Celtics, San Antonio Spurs ug Houston Rockets, apan didto napunting iyang huna-huna sa Cavs sa pamasin nga makadaog sa ikaduha niyang NBA ring.

Si Bogut apil sa Golden State Warriors nga nikampiyon sa NBA niadtong 2015-2016 season  batok sa Cavaliers.

Si Bogut giisip nga lig-on nga adisyon sa Cavaliers ug andam siya moduwa isip back-up  ni starting center Tristan Thompson. Dili kaayo aktibo sa opensa ang 7-footer center, apan ang iyang depensa maoy gikahadlokan karon sa mga koponan.

Ang anunsiyo ni Bogut nga moduwa siya sa Cavs nahitabo usa ka adlaw human  mipirma og kontrata uban sa Cavs ang kanhi All-Star point guard nga si Deron Williams. (BANAT NEWS)