CEBU, Philippines - Gipaila ni Vasyl Lomachenko nga siya ang hari sa junior lightweight division human niya gipaundang sa seventh round ang Jamaican power-puncher nga si Nicholas Walters sa ilang sangka didto sa Las Vegas.
Sa maong kadaugan, ang kanhi Olympian nga si Lomachenko nagpabiling WBO junior lightweight champion ug miinat sa iyang rekord ngadto sa 7-1, 5KOs.
Mas gikahadlokan ang kusog ni Walters, kinsa mi-KO sa Pinoy boxing star nga si Nonito Donaire Jr. niadtong tuig 2014. Apan lahi ang nahitabo kagahapon tungod kay mas mipatigbabaw ang kabangis sa Ukrainian.
Si Lomachenko mitugpa og kusog nga kombinasyon ngadto sa ulo ni Walters sa seventh round ug miundang kini dihang anaa na siya sa iyang korner kay gilumsan na siya og mga suntok. (BANAT NEWS)