CEBU, Philippines - Miresulta sa usa ka scoreless draw ang duwa tali sa Philippine Azkals ug karibal nga Singapore niadtong miaging gabii didto sa Philippine Sports Stadium.
Paborado unta nga mudaog ang Azkals tungod kay miduwa ang Singapore nga aduna lay 10 ka players, apan pakyas sila pagpahimus niini. Ang duha ka koponan nakadawat pulos og uno punto tungod sa maong resulta.
Ang Azkals kinahanglan hinuon nga makahimo og daog sa sunod nilang duwa ugma batok sa Indonesia aron maseguro ilang luna sa second round. Ang top two seeds sa matag group stage maoy moabante sa sunod round. Ang Indonesia napukan batok sa Thailand sa ilang duwa, 4-2.
Gisayangan ang coach sa Azkals nga si Thomas Dooley tungod kay daghan ang kahigayunan nga makuha unta nila ang daog batok Singapore. Ang Azkals adunay 14 ka goal attempts gikan nila ni Mike Ott, Stephan Schrock, Kenshiro Daniels ug Hikaru Minegishi apan walay bisan usa nga misulod. (BANAT NEWS)