Pagay Construction nidominar sa 20-20 cycling

CEBU, Philippines - Ang Team Pagay Construction sa pagpangulo ni Jhunvie Pagnanawon midominar sa stage 2 aron makuha ang team overall classification sa Cebu City 20-20 Cycling event nga gisuportahan sa Philippine Sports Commission sa miaging adlaw didto sa Barangay Busay, siyudad sa Sugbo.

Atol sa unang stage didto sa South Road Properties, ang Team Pagay igo lang mipuwesto sa ikaduha sunod sa Amor Ganda, apan namawi sila sa misunod nga stage diin  miiskor sila og daku nga labaw sa puntos aron pagdaog sa kampiyonato.

Gawas ni Pagnanawon, laing mibida sa Team Pagay mao sila si Michael Mier, Alvin dela Torre, Marcial Catagui, Karl Caparida ug Raymond Lin.

Ang Pagay Construction mitapos sa duha ka adlaw nga lumba sa aggregate time nga 38 minutos ug 41.32 segundos. Mipuwesto sa ikaduha  ang Keith de Fiebre sa ilang 39:01.36, samtang ang Amor Ganda nalagpot sa ikatulo sa ilang 39:18.37.

Human sa team event, ang mga siklesta mobanat pag-usab  alang sa individual time battle karong Domingo didto sa SRP. (BANAT NEWS)