Batch ‘97, gateway nakauna
CEBU, Philippines - Gipakgang sa Batch ‘97 ug Gateway Batch 2007 ang ilang karibal aron pagtikang ngadto sa usa na lang ka daog aron hingpit nang sakmiton ang kampiyonato sa tagsa-tagsa nila ka dibisyon sa PLDT SME Nation-Alfredo Gothong 21st Sacred Heart Ateneo Alumni Basketball Athletic Association (SHAABA) Cup niadtong Domingo sa gabii didto sa Magis Eagles Arena sa Sacred Heart School-Ateneo de Cebu sa Barangay Canduman, Mandaue City.
Sa Division B, si Magdaleno Sy mitali og 16 puntos dihang gibihag sa Batch ‘97 ang Dynacast Batch 2001, 65-54 aron pagposte og 1-0 nga bentaha sa ilang best-of-three finals series. Miabag ni Sy sila si Walter Ong nga dunay 13 puntos ug si Christopher Chad Go nga mikamada og 11 puntos.
Sa gubat alang sa ikatulong dapit, si Dennis Que mipabuto og 28 puntos alang sa Choobi Bay Crab '91 nga mikulit og makapaisag balahibo nga kadaugan batok sa AutoLAB ‘99, 67-66.
Sa Division C finals, si Arnold Sean Go mikadlit og 16 puntos alang sa Gateway 2007 nga mibuntog sa Kitrol Batch 2003, 65-51 aron pag-angkon og 1-0 nga labaw sa kaugalingon nilang serye.
Hingpit nang masakmit sa Gateway 2007 ug Batch ‘97 ang titulo kun ilang mapilde pag-usab ang ilang mga kontra karong Miyerkules sa gabii didto sa Sacred Heart old campus. (BANAT NEWS)
- Latest