CEBU, Philippines - Human gipakuratan sa miagi nilang mga duwa, ang twice-to-beat Teleperformance All-Stars, QBE Generals ug Dyninno Raptors hingpit nga mitapos sa tagsa-tagsa nila ka mga kontra aron pag-abante ngadto sa semifinals sa 12th CSCC E-League men's basketball tournament niadtong Sabado didto sa City Sports Club-Cebu gym.
Sa Elite Classic, si Dean Junber Escalon miwadwad og 19 puntos ug si Karlo Miñoza mitali og 12 alang sa All-Stars nga mitagak sa ePerformax Reds, 70-48.
Salida na tanan sa All-Stars sukad sila miposte og 16-8 nga labaw human sa unang kuwarter. Ilang gisirad-an ang halftime sa iskor nga 32-17 ug gitiwasan pa og kulata ang Reds sa ikatulong bahin sa duwa aron pagpaburot sa ilang labaw ngadto na sa 22 puntos, 50-28.
Sa Evo League, si Johnrey Girasol mikadlit og 20 puntos, pito ka rebounds ug upat ka assists ug si Christopher James Durango midonar og 17 puntos sa Generals nga mipalayas sa Contact Solutions Flying Lemurs, 85-60, samtang si Ignatius Loyola mibirada og 16 puntos ug 13 ka rebounds sa Raptors nga mipalagpot sa Kyocera Frontiers, 66-59. EBV (BANAT NEWS)