CEBU, Philippines - Si Marlon ‘Nightmare’ Tapales sa RWS Stable ni Cebuano promoter Rex ‘Wakee’ Salud manulong na karong adlawa didto sa Thailand bitbit ang dugang bagahi nga molampos sa labing una niyang world title fight didto sa balwarte sa iyang kontra.
Ang pag-away sa langyaw nga lapyahan kanunay malisud nga misyon sa matag Pinoy nga boksidor, apan si Tapales (28-2, 11KOs) nagkanayon nga andam siya nga mosungasong sa malisud nga tahas sa dihang iyang hagiton si defending Thai champion Pungluang Sor Singyu (52-3, 35KOs) alang sa WBO bantamweight title karong Hulyo 27 didto sa Ayutthaya Park sa Ayutthaya, Thailand.
“Sayod ko nga lig-on pud siya nga kontra mao nang ako siyang gipreparahan og maayo,” matud pa ni Tapales nga nakaangkon og katungod nga harungon si Sor Singyu human gipakamang sa ikaduhang hugna ang kanhi wa’y pildeng
Hapon nga si Shohei Omori sa ilang WBO elimination bout niadtong Pebrero 16 didto sa Shimazu Arena sa Kyoto, Japan.
“Wa ko’y lain nga ikapasalig kun dili ang pagpaningkamot nga kun ugaling maabot man gyud og 12 round ang among away, dapat ako maoy mokontrolar sa duwa. Apan kun naay tsansa, ato gyud siyang tumbahon kay lisud na kay ilaha mang lugar,” dugang pa ni Tapales.
Ang 24-anyos nga si Tapales molupad sa Thailand uban ni Salud ug sa iyang trainers nga sila si Brix Flores ug Fernando Ocon. Mokuyog kanila sila si Dong Secuya sa philboxing.com ug ang beteranong boxing writer nga si Nick Giongco.
“Andam na kaayo ko ug akong buhaton tanan kutob sa akong mahimo aron modaog kay damgo gyud nako nga ma-world champion,” saad pang Tapales.“Kun basihan lang ang among training, taas akong pagsalig ni Tapales nga modaog siya ning away. Basta ang ako lang dili lang gyud mokompiyansa,” matud pa ni Ocon.
Sa iyang bahin, si Salud naghinam-hinam nga makabaton na sab og world champion gikan sa iyang Stable diin si Manny Pacquiao kanhi nagbansay-bansay alang sa iyang rematch ni Marco Antonio Barrera walo ka tuig na ang milabay.
“Kani si Tapales puno gyud sa talento ug abilidad ug masaligon ko nga ma-world champion siya sa umaabot. Hinaut nga mao na kini ang iyang panahon,” dason pa ni Salud nga mao kanhi ang migiya sa karera nilang two-division world champion Gerry Peñalosa ug ex-WBC flyweight champion Malcolm ‘Eagle Eye’ Tuñacao. (BANAT PALARO)