CEBU, Philippines – Si NM Merben Roque nagtabla ug ni Renzi Kyle Sevillano sa katapusang hugna, apan mao ra kini ang iyang gikinahanglan aron pagsakmit sa titulo sa 3rd VMA Power Open Chess Tournament niadtong Domingo didto sa Colonnade Mall sa may dalan Colon, dakbayan sa Sugbo.
Gitapos ni Roque ang maong 7-round Swiss system competition uban ang kinatas-ang iskor nga 6.5 puntos aron pagbulsa sa P4,000 nga ganting salapi.
Sa iyang bahin, si Sevillano, Ronald Ganzon ug Diego Caparino parehong mitali og 6.0 puntos, apan si Sevillano maoy mipahiluna sa ikaduhang dapit gumikan sa mas taas niining tie-breaker. Mibulsa siya og P3,000, samtang sila si Ganzon ug Caprino nakadawat og P2,000 ug P1,000.
Sila si NM Arnold Cadiz, Carlos Moreno III, Mario Mangubat, Rommel Ganzon, Joel Pacuribot ug Yves Fiel nakadawat og P500 matag usa gumikan kay naapil sila sa top 10.
Nahatagan sab og espesyal nga premyo ang top three ladies nga sila si Quennie Cablao, Keith Claire Morala ug Faith Mangubat ug ingon man ang top kiddie players nga sila si Jeremy Pepito, Edsel Vosotros ug Joel Belano.
Gipaluyohan sa Cebu Executives and Professionals Chess Association, ang duha ka adlaw nga torneyo gipasiugdahan ni CEPCA Vice President Engr. Marvyn Guardiana. Mipadagan sa mga duwa mao si FIDE Arbiter Marvin Y. Ruelan inabagan ni Tony Cabibil. (BANAT NEWS)