CEBU, Philippines – Di matukib nga kalipay ang gibati sa team Alitz human nila madaog ang ‘back-to-back’ championships sa Sunday.com basketball tournament bisan pa sa taliwala sa kalisud.
Ang bagsik nga Alitz milatigo sa Bulldogs, 67-61 sa finals sa ikaduhang torneyo sa Sunday.com niadtong Domingo didto sa Benedicto College gym sa A.S. Fortuna st., Mandaue City.
Kini ang ikaduhang sunod-sunod nga panag-abot sa duha ka karibal sa finals diin midaog sab ang Alitz sa miaging tuig.
Sa gilauman, si Rufiel Palabay maoy misalida og maayo aron pangulohan na sab ang Alitz pinaagi sa iyang 25 puntos, 14 niini iyang nahimo sud lang sa first quarter. Mipakita sab og maayong labok si Dodoy Grafe, kinsa miamot og 15 puntos alang sa Alitz nga mao kanunay ang naglabaw gikan sa sinugdanan.
Medyo nahulga sa makadiyot ang Alitz dihang milabaw ang Bulldog sa labing unang higayon, 47-45 sa sayong bahin sa fourth quarter sa tira ni Antigua.
Hinuon, ang Alitz alisto sab kaayong nakatubag sa ilang opensa ug milansang og 55-49 nga bentaha sa katapusang 7:11 sa final period sa 3-pointer ni Macmac Nadera. Si Nadera igo lang miiskor og singko puntos, apan ang depensa niya ngadto kang Dado Apa Jr. nakahatag og dakung danyos ngadto sa Bulldog.
Ang Bulldog gipangulohan ni Tawing Grafe nga mikabkab og 21 puntos, gisundan ni Allan Bacus nga mitangag og 12 puntos.
Sa sayo pa, ang Mustang mipukan sa Astroboy, 78-67 aron sakmiton ang third place trophy.
Gipangulohan ni Joel Sayson ang Mustang nga mitusak og 18 puntos. Si Ray Neiz mikamada’g 17 puntos, samtang si Zarrel Gulbin mitampo’g 15 puntos.
Lima ka players ang miiskor og double figures alang sa Astroboy pinangulohan ni James Latonio pinaagi sa iyang 24 puntos. Laing naka-double figures mao sila si Lyndon Ancajas ug Ronald Tejada nga adunay 12 puntos matag usa ug silang Jojo Carba ug Justin Pesons nga parehong miantog og 10 puntos.
Napilde man tuod, apan angayan gihapon nga daygon ang Astroboy gumikan kay bisan kulang sila og tawo, nakasugakod man sila sa kutas nga kumbati.
Ang liga nagmalampuson tungod sa suporta sa VECO ug ni Mandaue City Mayor Jonas Cortes.
Gipadagan kini ubos sa aktibo nilang presidente nga si Tata Nadera inabagan sa tanang miyembro sa Sunday.com ballclub.
Puntos Matag Usa
Unang duwa (For third)
MUSTANG (78) – Sayson 18, Neiz 17, Gulbin 15, Antigua 4, Ejares 4, Del Castillo 4, Chavez 4, Nosaj 3, Jungavs 2, Wado 2, Quiñahan 2, Dabon 2.
ASTROBOY (67) – Latonio 24, Ancajas 12, Tejana 12, Carba 10, Pesons 10.
Ikaduhang duwa: (Championships)
ALITZ (67) – Palabay 25, Grafe 15, Malahos 8, Nadera 5, Antigua 4, Faelnar 2, Neri 2, Sayson 2, Armero 2, Malig-on 2.
BULLDOG (61) – Tawing 21, Bacus 12, Apa Jr. 8, Ygot 8, Yu 4, Antigua 4, Gulbin 2. (BANAT NEWS)